Theatr y Crucible

Theatr y Crucible

Enghraifft o:	theatr, lleoliad chwaraeon
Deunydd	concrit cyfnerthedig, metel dalennog
Gwlad	Lloegr
Rhan o	Sheffield Theatres
Dechrau/Sefydlu	1969
Lleoliad	Tudor Square
Perchennog	Sheffield Theatres
Gwladwriaeth	y Deyrnas Unedig
Rhanbarth	Dinas Sheffield
Gwefan	https://www.sheffieldtheatres.co.uk/whats-on/crucible-theatre
Dynodwyr
Freebase	/M/02417v
Quora	Crucible-theatre
Ffeiliau perthnasol ar Gomin Wicimedia

Theatr yn Sheffield, De Swydd Efrog yw Theatr y Crucible, neu'n syml The Crucible, a agorodd ym 1971. Cyfeiria'r enw at ddur croeslin, a ddatblygwyd yn Sheffield ym 1740 ac a ysgogodd ddiwydiannu'r ddinas.

Yn ogystal â llwyfannu perfformiadau theatrig rheolaidd, mae'r theatr hefyd yn gwasanaethu fel lleoliad chwaraeon, ar ôl cynnal Pencampwriaeth Snwcer y Byd yn flynyddol ers 1977. Mae papur newydd y Guardian wedi galw'r Crucible yn "gartref ysbrydol snwcer".

Ym mis Mai 2022, datgelwyd cynlluniau arfaethedig i adeiladu lleoliad newydd â 3,000 o seddi gerllaw gyda phont yn cysylltu'r ddau adeilad.

Mae nifer o Gymry amlwg wedi perfformio ar lwyfan y theatr, ac yn gweithio yno fel Phil Clark a Peter Gill. Bu Daniel Evans yn gyfarwyddwr artistig yno rhwng 2010 a 2016.

Arweinyddion artistig

• Colin George (1971– 1974)
• Peter James (1974 – 1981)
• Clare Venables (1981 – 1992)
• Michael Rudman (1992 – 1994)
• Deborah Paige (1995 – 2000)
• Michael Grandage (2000 – 2005)
• Samuel West (2005 – 2007)
• Daniel Evans (2010 – 2016)
• Robert Hastie (2016 – 2024)
• Elizabeth Newman (2024 – presennol)

Cefndir

Adeiladwyd Theatr y Crucible gan M. J. Gleeson a'i hagor yn swyddogol ym 1971. Fe ddisodlodd Gwmni Theatr Repertory Sheffield, oedd wedi'i lleoli yn Townhead Street yn y Sheffield Playhouse. Ym 1967, argymhellodd cyfarwyddwr artistig sefydlol y Crucible, Colin George, y byddai llwyfan ymwthiol yn gweddu i Sheffield, wedi'i ysbrydoli gan theatrau a grëwyd gan Syr Tyrone Guthrie. Cafodd Tanya Moiseiwitsch, oedd wedi bod yn rhan o ddylunio theatrau Guthrie, ei recriwtio i gynorthwyo dylunio theatr Gleeson.

Adeiladwyd y Theatr ar gyn-safle Gwesty'r Adelphi, a gaeodd ym mis Mai 1969 ac a ddymchwelwyd yn fuan wedyn. Cyflogwyd y penseiri Renton Howard Wood Levin Architects, ac fe'i cwblhawyd mewn dwy flynedd, gan agor yn swyddogol ym mis Tachwedd 1971. Ymysg y cynyrchiadau cyntaf roedd Swansong gan Anton Chekhov, gydag Ian McKellen ac Edward Petherbridge.

2007 – 2010

Cystadlaethau Snwcer yn Sheffield yn 2013

Fel Adeilad rhestredig II, bu'n rhaid adnewyddu'r Theatr rhwng 2007 a diwedd 2009, ar gôst o £15 miliwn, gan ail-agor yn unig yn ystod y cyfnod hwnnw ar gyfer Pencampwriaethau Snwcer y Byd 2008 a 2009. Ailagorwyd y Crucible fel theatr ar 11 Chwefror 2010 o dan arweinyddiaeth y Cymro Daniel Evans, gyda chynhyrchiad o An Enemy of the People gan Henrik Ibsen. Ar y 18 Chwefror, cafodd ei hagor yn swyddogol gan y Tywysog Edward.

Theatrau Sheffield

Ers ei hail-agor, mae'r Crucible bellach yn ran o Grŵp Theatrau Sheffield sy'n cynnwys y Playhouse llai a Theatr y Lyceum gyferbyn â hi. Theatr gynhyrchu yw'r Crucible lle mae sioeau'n cael eu cynllunio a'u hymarfer yn fewnol, ac felly mae'r grŵp yn goruchwylio'r cynyrchiadau teithiol sy'n ymweld â'r ddinas.

Cyn ac ar ôl yr adnewyddu

Ebrill 2005

Gorffennaf 2010

2022 hyd y presennol

Ym mis Mai 2022, datgelwyd cysyniadau arfaethedig ar gyfer lleoliad newydd ar gyfer Pencampwriaeth Snwcer y Byd a fyddai'n gysylltiedig wrth adeilad presennol Theatr y Crucible, drwy gyfrwng pont. Gallai'r lleoliad newydd gynnal hyd at 3,000 o wylwyr. Roedd hyrwyddwr snwcer Barry Hearn wedi cadarnhau bod trafodaethau ar y gweill gyda Chyngor Dinas Sheffield ym mis Ebrill 2022. Ychwanegodd Hearn y gallai'r twrnamaint symud i rywle arall os na chaiff y prosiect newydd ei gefnogi ond, "mae'r enw Crucible yn gyfystyr â snwcer yn fyd-eang". ... felly mae'n rhaid i'r enw aros." Crëwyd y cysyniadau ar gyfer yr adeilad newydd gan James Burland, y pensaer y tu ôl i Stadiwm Dinas Manceinion, ynghyd ag Arup. Mae cynigion hefyd yn awgrymu y gallai'r adeilad fod yn gartref i amgueddfa snwcer.

Ar 24 Mawrth 2026, cyhoeddwyd y byddai'r Crucible yn cael ei hadnewyddu yn dilyn Pencampwriaeth Snwcer y Byd 2028 i gael hyd at 500 o seddi ychwanegol, gan gynyddu ei gapasiti posibl i 1,480. Mae'r gwaith adnewyddu wedi'i gynllunio i fod wedi'i gwblhau mewn pryd ar gyfer cynnal y digwyddiad yn 2030.

Cynyrchiadau nodedig

Sioe a gynhyrchwyd yn 2017

• Chicago (1978) llwyfanniad cynnar o'r sioe gerdd gan Kander and Ebb
• Talent (1978) drama lwyfan gyntaf gan Victoria Wood
• The Wiz (1980) llwyfaniad uchelgeisiol o'r addasiad cerddorol Affricanaidd-Americanaidd o The Wizard of Oz.
• Amadeus (1986) ail-lwyfanniad o ddrama fawr Peter Shaffer
• Twelfth Night (1987) llwyfanniad arbrofol o ddrama Shakespeare
• The Northern Mystery Plays (1989) Dehongliad uchelgeisiol a phoblogaidd o draddodiad y dramâu dirgelwch canoloesol.
• Peter Pan (1992) sioe nadolig
• King Lear (1997) gan Shakespeare
• The Crucible (2004) gan Arthur Miller
• The Romans in Britain (2006) ail-lwyfanniad Samuel West o ddrama ddadleuol Howard Brenton.
• As You Like It (2007) gan Shakespeare
• Hamlet (2010)
• Othello (2011)
• Everybody's Talking About Jamie (2017) sioe gerdd a darddodd yn Sheffield ac a ddaeth yn llwyddiant rhyngwladol.
• Standing at the Sky's Edge (2019) sioe gerdd arwyddocaol o Sheffield, a lwyfannwyd yn ddiweddarach yn y Theatr Genedlaethol Frenhinol ac yn y West End.
• Life of Pi (2019)