Attore
Ll'attore (ô femminile attrice) è chi rapprisenta o 'nterpreta na parte 'int'a nu spettaculo 'e tiatro, 'e cinema, 'e televisione, 'e radio o pe' mmiez'â strata.
Storia
[cagna | cagna surgente]'A traccia cchiù antica ncopp'a ll'attore se trova 'int'a nu testo d’’e Veda, addò se danno cunziglie a nu gruppo d'atture-prievete d’’o primmo tiatro indiano.[1]
'Int'ô munno occidentale 'o primmo attore ca se canosce è 'o grieco Tespi, ca 'int'ô 530 a.C. sagliette ncopp'ô palcoscenico d’’o tiatro 'e Atene p’’e ffeste 'e Dioniso e fuje 'o primmo a parlà comme perzunaggio. Primma 'e isso 'e storie se cuntavano cu puesie, museca e abballo, ma sempe 'n terza perzona. P'annore suojo ll'atture fujeno chiammate Tespiane, e ancora mo se dice "saglì ncopp'ô carro 'e Tespi" pe' chi accummencia a ffà ll'attore.
Eschilo mettette nu siconno attore, e accussí se putette fà 'o dialogo; Sofocle ce ne mettette nu terzo. Ll'atture 'e chillo tiempo s'mparavano a recità, ma pure a abballà, a cantà e a ausà 'a maschera. 'Int'â Grecia antica ll'atture erano pavate d’’o Stato e puteveno avé privilegge e annure.
'Int'â Roma antica, mmece, 'o tiatro perdette ogne carattere sacro e addeventaje nu spasso. Ll'atture, chiammate histriones, se pigliavano mmiez'ê schiave e nun erano stimate pe' niente; si 'a recita nun piaceva, 'o pubbreco puteva siscà. Ll'atture cchiù famuse fujeno Esopo e Roscio.
'Int'ô Medioevo ll'attore era, pe' cchiù, 'o prevete, e 'o dramma era chillo cristiano ca veneva d’’a liturgia. 'Int'ê pruggessione e 'int'ê ffeste recitavano pure cittadine dilettante, e quaccheduno se mettette a ffà 'o comico 'e mestiere pe' ll'ustarie e 'int'ê chiazze.
Verso 'a mità d’’o XVI seculo ascettero 'e comice d’’a commedia dell'arte, ca sapevano fà mimica, acrobazzie e soprattutto 'o lazzo, quase sempe mpruvvisato. Tanno sagliette ncopp'ô palcoscenico pure 'a femmena, e nascettero 'e primme cumpagnie ca giravano cu 'e carre lloro, ma 'a Chiesa lle steva contro.[1] Nfra 'e comice taliane cchiù famuse ce stanno Tiberio Fiorilli, ditto Scaramuccia e maestro 'e Molière, e Silvio Fiorillo, 'o primmo Pulecenella.
'Int'ô XIX seculo 'o pubbreco se facette cchiù gruosso e ll'attore addeventaje nu mudello d'eleganza e 'e cultura, n'idolo ammirato pe' isso stesso cchiù ca p’’o perzunaggio. Accussí nascette 'o fenomeno d’’o mattatore. Nfra ll'atture cchiù famuse ce stanno Sarah Bernhardt 'n Francia e, 'n Italia, Adelaide Ristori, Tommaso Salvini, Eleonora Duse e Ermete Zacconi.
'Int'ô XX seculo 'o divismo passaje d’’o tiatro ô cinema e â televisione, e ll'atture 'e mo ponno addeventà mudelle 'e moda, 'e parlà e 'e cumpurtamento. Nfra ll'atture cchiù 'mpurtante d’’o seculo ce stanno Greta Garbo, Anna Magnani, Rodolfo Valentino, Marlene Dietrich e James Dean.
'A parola
[cagna | cagna surgente]'A parola vene d’’o llatino actor, vale a dicere "chillo ca fa". Primma attore era sulo p’’e uommene: 'e ffemmene accumminciajeno a recità sulo 'int'ô XVII seculo, e tanno se mettette a ausà pure attrice. A ll'epoca 'e William Shakespeare, 'e parte 'e femmena 'e ffacevano uommene o guagliune. Ll'attore ca fa perzunagge assaje tipizzate se chiamma caratterista.
Attrice 'int'ê parte 'e masculo
[cagna | cagna surgente]Cierte vvote ll'attrice fanno 'a parte 'e guagliune o 'e criature. P'esempio, Peter Pan tradizziunalmente 'o fa na femmena, e 'int'ê cartune animate 'e guagliune so' duppiate quase sempe 'a femmene. Pure 'int'â opera lirica cierti ruole 'e masculo so' cantate 'a voce 'e femmena, comme Cherubino 'int'a Le nozze di Figaro. Fà 'a parte 'e ll'ato sesso pe' ffà ridere è na tradizzione antica d’’o tiatro e d’’o cinema: 'int'a cchiù 'e na cummedia 'e Shakespeare ce stanno travestimente.
Tecniche 'e recitazzione
[cagna | cagna surgente]Ll'atture ausano diverze tecniche ca s'mparano cu 'o studio e cu ll'esperienza:
- ll'uso d''a voce (dizzione, 'ntunazzione e rispirazzione) pe' fà capì 'o perzunaggio e 'e sentimente suoje;
- n'aspetto ca s'appatta c''o perzunaggio, pe' 'o fà parè vero ô pubbreco;
- 'a gestualità, pe' accumpagnà 'e pparole e se rapportà cu ll'ati atture;
- sercizie 'e rilassamento e 'e visualizzazzione, pe' tené 'a capa ncopp'ô lavoro e perdere 'a paura d’’o pubbreco.
Premmie
[cagna | cagna surgente]- Premio Oscar (cinema)
- David di Donatello (cinema)
- Golden Globe (cinema e televisione)
- Premio Emmy (televisione)
- BAFTA (cinema e televisione)
- Premio Ubu (tiatro)
- Premio Tony (tiatro)
