Krimkrich
 Tekst üüb Fering |
A Krimkrich (üüb Rüs: Восточная война Wostotschnaja wojna of Крымская война Krymskaja wojna, üüb Türkisk: Kırım Savaşı, üüb Ingels: the Crimean War, üüb Fraansöösk: la Guerre de Crimée an üüb Italjeens: la guerra di Crimea) wiar en militeerisken konflikt twesken Rüslun üüb det ian sidj an det Osmaans Rik an uk sin ferbündeten Frankrik, det Ferianigt Köningrik an (sant 1855) uk Sardiinien-Piedmont üüb det öler sidj. A krich wooret faan Oktuuber 1853 tu Febrewoore 1856. Det begand üüs de njüügenst Rüs-Türkisk Krich, diaruun dön waasteuropeesk meechten iingreeb, am en ütjwidjing faan rüs territoorium üüb koosten faan det swaaket Osmaans Rik tu ferhanrin.
Uun deheer krich naam lidj üüs Florence Nightingale, begrünjiger faan det modern waastelk kraankenpleeg, Lew Tolstoj, rüs skriiwer, an Henry Berkeley Fitzhardinge Maxse, leeder onerguwernöör an guwernöör faan Haliglun dial.
